Kjarnorkuslys veldur þangkreppu í sushigerð

Kjarnorkuslysið í Fukushima í Japan er farið að hafa áhrif á sushigerð víða um heiminn. Innflytjendur eru farnir að segja nei takk við soja, þangi, wasabi og grænmeti frá Japan. Í staðinn getur almenningur og matvælafyrirtæki utan Japan vænst þess að fá lélegri eftirlíkingar frá Kína til sushigerðar.

Fjallað er um málið í Jyllands Posten undir fyrirsögninni: Kjarnorkuslys veldur þangkreppu í sushigerð. Þar segir að stærsti sushiframleiðandi Danmerkur, Taste of Tokyo, hafi þegar stöðvað allan innflutning sinn frá Japan. Taste of Tokyo sérhæfir sig í að framleiða sushi fyrir stórmarkaði.

„Við erum vanir að kaupa soja, wasabi, engifer og þang frá Japan. Hinsvegar höfum við ekki pantað neitt frá þeim síðan að kjarnorkuslysið varð,“ segir Anders P. Christensen forstjóri Taste of Tokyo og bætir því við að framleiðslan gangi nú fyrir hráefni sem fyrirtækið átti á lager áður en slysið varð. Verið sé að leita að öðrum birgjum.