Trulli býst við miklum stuðningi við Lotus í Malasíu

Lotus lið Heikki Kovalainen og Jarno Trulli verður á einskonar heimavelli í Malasíu um helgina, en yfirmaður liðsins, Tony Fernandez er heimamaður og hann segir liðið hafa djúp tengsl við Malasíu. Malasíska ríkisstjórnin á t.d. hlut í liðinu ásamt fleiri aðilum. Malasískir starfsmenn eru einnig hjá liðinu, sem hefur verið byggt upp á 18 mánuðum, en bílarnir eru settir saman í bækistöð Lotus liðsins í Norfolk í Englandi.



Lotus liðið nýtir sér reynslu reyndra ökumanna i formi Kovalainen og Trulli. Kovalainen hefur m.a. ekið fyrir McLaren og Trulli fyrir Toyta, sem bæði hafa haft nægt fé í þróunarvinnu.



„Líkamlega er þetta eitt erfiðasta mótið, ásamt Singapúr sem er líka erfitt. Þetta er mót sem við byrjuðum að undirbúa strax eftir Ástralíu. Ég kom til Malasíu strax eftir Melbourne til að venjast rakastiginu og vinn með næringafræðingi mínum til að undirbúa fyrir keppnina. Ef maður undirbýr sem almennilega, þá er þetta ekkert mál. Ég hlakka til að vera í hitanum og hann truflar mig ekkert", sagði Kovalainen um undirbúning fyrir mótið á Sepang brautinni um helgina í fréttatilkynningu frá Lotus.



Trulli segist fullur eldmóðs fyrir helgina.



„Við erum að keppa á heimavelli okkar og við viljum gera okkar til að áhorfendur verði stoltir af okkur. Það verður mikill stuðningur við okkur á áhorfendapöllunum. Ég hef verið hérna í viku og hef þegar séð stuðningurinn hefur vaxið frá því í fyrra", sagði Trulli.



„Ég hef átt annríkt síðan ég kom og æfði í malasískum hæðum á reiðhjóli með fagmönnum héðan. Það er góður undirbúningur fyrir erfiða helgi í bílnum. Sepang brautin reynir verulega á og reynir mikið á ökumenn og bíl, en við trúum því að við séum með búnað sem ætti að hjálpa okkur hérna í Malasíu. Ég hlakka til að sjá hvernig bíllinn verður í hitanum."



„Í fullkomnum heimi þá værum við færir um að gera eitthvað stórfenglegt fyrir framan heimamenn og stuðningsmenn okkar, en sjáum til. Við erum nær miðlungs liðunum, en fyrir ári síðan. En við þurfum að sækja fram veginn og við erum allir raunsæir og vinnum hörðum höndum að því að færast framar á þessu ári", sagði Trulli.