Keflavík vann í Ljónagryfjunni og er aðeins einum sigri frá titlinum

Keflavíkurstúlkur eru aðeins einum sigri frá fjórtánda Íslandsmeistaratitlinum eftir þriggja stiga sigur á Njarðvík, 67-64, í Ljónagryfjunni í kvöld i öðrum leik liðanna í úrslitaeinvígi Iceland Express deildar kvenna.

Bryndís Guðmundsson átti stórleik hjá Keflavíkurliðinu en hún var með 24 stig þar af 20 þeirra í fyrri hálfleik. Ingibjörg Jakobsdóttir skoraði 12 stig og Marina Caran var með 11 stig.

Shayla Fields skoraði 25 stig fyrir Njarðvík, Julia Demirer var með 15 stig og 10 fráköst og Dita Liepkalne skoraði 14 stig. Íslensku stelpurnar skoruðu hinsvegar bara 10 stig og munaði mikið um það.

Njarðvíkurliðið tók strax forystuna í leiknum, komst í 6-2, 10-4 og 15-8 og náðí mest tólf stiga forskoti í fyrsta leikhluta, 22-10. Keflavíkurliðið náði hinsvegar að minnka muninn í 22-16 með því að skora sex síðustu stig leikhlutans. Bryndís Guðmundsdóttir skoraði 11 af 16 stigum Keflavíkur í fyrsta leikhlutanum en Shayla Field var á sama tíma komin með níu stig.

Ingibjörg Jakobsdóttir setti niður tvo þrista á fyrstu þremur mínútum annars leikhluta og kom Keflavík yfir í 26-24 með þeim síðari. Keflavík var þá búið að skora 12 af fyrstu 16 stigum leikhlutans og vinna fimm mínútna kafla 18-4.

Keflavíkurliðið hélt áfram, vann að lokum annan leikhlutann 33-14 og var því komið með þrettán stiga forskot í hálfleik, 49-36. Ingibjörg skoraði 9 stig í leikhlutanum og Bryndís var kominn með 20 stig í hálfleik.

Njarðvíkurliðið vann þriðja leikhlutann 19-14 og náði að minnka muninn í 55-63 fyrir lokaleikhlutann. Shayla Fields skoraði fyrstu körfu fjórða leikhluta og minnkaði muninn í sex stig en Njarðvíkurstelpur komust ekki nær fyrr en að Ólöf Helga Pálsdóttir minnkaði muninn í fimm stig þegar 80 sekúndur voru eftir.

Shayla Fields náði síðan að koma muninum niður í þrjú stig, 64-67, þegar 45 sekúdnur voru eftir. Njarðvíkurliðið komst hinsvegar ekki nær og Keflavíkurliðið fagnaði sigri og því að vera skrefi nær fjórtánda meistaratitlinum.

Njarðvík-Keflavík 64-67 (36-49)Stig Njarðvíkur: Shayla Fields 25/4 fráköst/5 stoðsendingar, Julia Demirer 15/10 fráköst, Dita Liepkalne 14/8 fráköst, Ólöf Helga Pálsdóttir 7/6 fráköst, Anna María Ævarsdóttir 2, Ína María Einarsdóttir 1.

Stig Keflavíkur: Bryndís Guðmundsdóttir 24/7 fráköst, Ingibjörg Jakobsdóttir 12, Marina  Caran 11/7 fráköst, Birna Ingibjörg Valgarðsdóttir 8/6 fráköst, Lisa Karcic 6/10 fráköst/5 stolnir, Pálína Gunnlaugsdóttir 4/8 fráköst, Hrund Jóhannsdóttir 2.