Messi skemmdi neyðarútgang í flugvél

Lionel Messi, leikmaður Barcelona, gekk aðeins of langt þegar hann fagnaði spænska meistaratitlinum í flugvél á leið heim til Barcelona frá Levante í vikunni.

Eftir að skálað var í kampavíni í flugvélinni fóru leikmennirnir að syngja og dansa. Messi sat við hliðina á neyðarútgangi sem skemmdist í miðjum fagnaðarlátunum.

Flugfreyjur skömmuðu Messi fyrir þetta og flugstjórinn neyddist til að biðja menn um að róa sig í kallkerfi flugvélarinnar.

Sjálfsagt örlítið neyðarlegt fyrir Messi sem hefur þó vafalaust jafnað sig fljótt og vel.