Vettel ánægður eftir erfiðan dag

Sebastian Vettel vann sinn fjórða sigur í Formúlu 1 ár þessu keppnistímabili í dag, eftir harða keppni við Lewis Hamilton á McLaren allt til loka mótsins á Katalóníu brautinni á Spáni. Munaði aðeins 0.630 úr sekúndu á þeim í endamarkinu.

Heimamaðurinn Fernando Alonso náði þó forystu í mótinu, eftir að hafa stokkið úr fjórða sæti í það fyrsta fyrir fyrstu beygju, eftir ræsinguna.

„Þetta var nokkuð erfitt í dag. Í upphafi mótsins taldi ég að ég hefði náð að ræsa vel af stað. Ég skil ekki hvaðan Fernando kom! Hann ræsti af stað á eftir mér, 16 metrum á eftir og hann var orðinn samhliða mér hálfa leið að fyrstu beygju. Hann komst inn fyrir Mark, ég fór að utanverðu og Alonso var kominn í fyrsta sæti í fyrstu beygju", sagði Vettel um upphaf mótsins í dag.

Baráttan um sigur á Katalóníu brautinni þróaðist út í slag á milli Lewis Hamilton og Vettel, eftir að Alonso hafði tekið þjónustuhlé í tuttugasta hring. En Vettel komst í forystuhlutverkið í 24 hring, þegar hann og Hamilton höfðu báðir tekið 2 þjónustuhlé, en þeir tóku í heildina 4 þjónustuhlé hvor í keppninnni.

„Allir vildu nota mjúku dekkin í upphafi og helmingur mótsins var á hörðu dekkjunum. McLaren menn virtust mjög sterkir og voru með aðra keppnisáætlun, sem færðu þeim annað sætið á eftir okkur."

„Eftir það vissi ég að þetta yrði mjög, mjög jafnt og í síðustu 10 hringjunum leið mér eins og í mótinu í Kína. Ég var að missa dekkjagrip og bað þess að það sama væri að gerast hjá Lewis, því hann virtist vera að ná mér. Þeir virtust fljótari, sérstaklega á síðasta tímatökusvæðinu. Í lok beina kaflans var hann í speglunum hjá mér og ég vissi ekki hvort ég átti að verjast eður ei. Þetta var jafnt, en í tveimur síðustu hringjunum náði ég að halda þetta út í tveimur síðustu hringjunum."

„Kers-kerfið var af og á, sem þýddi að ég var að spila mikið á að stilla bremsuátakið (á milli fram og afturhjóla). McLaren og þá sérstaklega Lewis var okkur erfiður. Það er léttir að fara yfir endamarkslínuna og vita að þú hefur náð settu marki. Ég er mjög, mjög ánægður. Þetta eru frábær úrslit, og góð staðfesting á að við erum sterkir. En eins og við var að búast er McLaren og Ferrari að gera okkur erfitt fyrir og pressa stíft. Ég er mjög ánægður í dag", sagði Vettel.