Williams liðið samdi við Renault um samstarf 2012 og 2013

Formúlu 1 lið Williams hefur samið við Renault um að útvega liðinu vélar frá og með næsta keppnistímabili, en meistaralið Red Bull notar Renault vélar, rétt eins og Renault liðið sjálft og Lotus. Williams vann marga titla með Renault á árum áður og keppir í breska kappakstrinum um næstu helgi á Silverstone.

Williams og Renault sömdu um samstarf til tveggja ára, 2012 og 2013 en líkur eru leiddar að áframhaldandi samstarfi 2014 í fréttatilkynningu Williams liðsins um málið, þegar V6 vélar verða notaðar. Frá árinu 1989 til 1997 vann Williams fjóra meistaratitila ökumanna og fjóra titla bílasmiða með Renault vélar um borð í bílum sínum. Meðal ökumanna á þessum tíma voru Nigel Mansell, Alain Prost, Damon Hill og Jaques Villeneuve.

„Við erum hæstánægðir með nýtt samstarf við Renault. Þetta sameinar liðið með leiðandi bílaframleiðanda og styður nýtt samstarf okkar við Jaguar. Á sama tíma erum við þakklátir Cosworth, sem hafa verið sanngjarnir og áreiðanlegir samstarfsaðilar, innan og utan brautar síðustu tvö ár", sagði Frank Williams og gat þess að eitthvað samstarf yrði við Cosworth á öðrum sviðum hjá Williams.

„Fyrri samskipti okkar við Renault voru meðal þeirra farsælustu í sögu Williams, en við dveljum ekki mikið við söguna. Við höfum til framtíðar og endurbyggjum orðstír okkar á brautinni", sagði Williams.