Kristinn Jakobsson dæmir í París

Kristinn Jakobsson hefur fengið verkefni í undankeppni Evrópudeildarinnar en hann mun dæma leik Paris Saint-Germain og FC Differdange 03 frá Lúxemborg sem fram fer á Parc des Princes í París 25. ágúst næstkomandi.

Það verður íslenskur dómarakvartett á leiknum því aðstoðardómarar verða þeir Sigurður Óli Þórleifsson og Gunnar Sverrir Gunnarsson en fjórði dómari er síðan Magnús Þórisson.

Þetta er seinni leikur liðanna en sá fyrri fer fram á Stade Josy Barthel vellinum á fimmtudaginn. Slóvenski dómarinn Matej Jug dæmir hann. Það lið sem hefur betur í þessum tveimur leikjum kemst inn í riðlakeppni Evrópudeildarinnar.