Ótrúlegur sigur hjá Murray

Andy Murray var afar létt eftir að honum hafði tekist að vinna nauman sigur á Hollendingnum Robin Haase í fimm settum á opna bandaríska meistaramótinu í tennis.

Murray tapaði fyrstu tveim settunum í leiknum en klóraði sig aftur inn og vann magnaðan 3-2 sigur.

"Þetta var ótrúlegur endir á leiknum. Ég er afar glaður að hafa komist í næstu umferð. Ég verð að gera mun betur þar en í þessum leik," sagði Murray en hann sagði einnig að sigurinn væri einn sá eftirminnilegasti á sínum ferli.

"Ég var ótrúlega rólegur eftir að hafa komist í vonda stöðu í leiknum. Ég tók bara eitt skref í einu og þetta var sætt."