Rooney spilar leikinn í Rúmeníu í kvöld

Sir Alex Ferguson, stjóri Manchester United, gaf það út á blaðamannafundi að Wayne Rooney verði í byrjunarliðinu í leiknum á móti rúmenska liðinu Otelul Galati í Meistaradeildinni í kvöld.

Sir Alex byrjaði með Rooney á bekknum í 1-1 jafnteflinu á móti Liverpool um síðustu helgi en hann kom inn á sem varamaður og bjargaði meðal annars á síðustu stundu í stórsókn Liverpool undir lokin.

„Hann var fullur af orku og áhuga þegar hann kom inn á móti Liverpool. Hann vildi ólmur komast inn á völlinn sem er hið besta mál," sagði Sir Alex Ferguson.

„Það var mikið sjokk fyrir hann þegar hann frétti af leikbanninu því hann bjóst ekki við svona löngu banni ekki frekar en við," sagði Sir Alex sem ákvað því að Rooney væri ekki andlega tilbúinn í að byrja á móti Liverpool en nú líta hlutirnir öðruvísi út.

„Wayne mun spila á morgun," sagði Ferguson. Rooney missti af síðasta Meistaradeildarleik United sem endaði með 3-3 jafntefli á móti Basel. Eftir jafntefli í tveimur fyrstu leikjum sínum þá þarf United á sigri að halda í Rúmeníu í kvöld.