Hafa verulegar áhyggjur af einkageiranum

Einkageirinn í Evrópu sér fram á erfiða tíma á næstunni og eru fyrirtæki á flestum sviðum atvinnulífsins þegar farin að búa sig undir lítinn vöxt. Þetta segir Chris Williamson, aðalhagfræðingur ráðgjafafyrirtækisins Markit, í viðtali við Wall Street Journal.

Svo virðist sem slakinn í hagkerfunum sé að valda stjórnendum einkafyrirtækja á öllum sviðum miklum áhyggjum, að því er segir í frétt WSJ. Kannanir benda til þess að atvinnuleysi sé frekar að fara aukast heldur en hitt. Vandinn er sérstaklega víðtækur í Suður-Evrópu. Á Spáni eru einkafyrirtæki enn að draga saman seglin þó atvinnuleysi mælist nú 21%. Á meðal ungs fólks á aldrinum 16 til 24 ára er atvinnuleysið allt að 40%.

Williamson segir í frétt WSJ að vandamálið í Evrópu sé ekki minna hjá almennum einkafyrirtækjum heldur en þjóðríkjunum sjálfum. Nauðsynlegt sé að grípa til aðgerða sem leiða til hagvaxtar. Annars sé voðinn vís.