Klose brjálaður út í stuðningsmenn Lazio

Þjóðverjinn Miroslav Klose vill ekkert hafa með þann hóp stuðningsmanna Lazio sem bendluðu hann við þýsku nasistahreyfinguna.

Ákveðinn öfgahópur úr hópi stuðningsmanna Lazio hafa verið kenndir við fasisma og um síðustu helgi var búið að útbúa borða sem á stóð „Klose mit uns“ sem þýðir „Klose er með okkur.“

Á borðanum voru sterkar tilvísanir í nasisma og bókstafurinn S til að mynda teiknaður til að líkjast tákni SS-sérsveita nasista úr seinni heimsstyrjöldinni.

„Ég er brjálaður,“ sagði Klose við ítalska fjölmiðla. „Það á að halda knattspyrnu og pólitík aðskildri. Svona lagað á ekki að sjást á knattspyrnuleikvöngum.“