Milan hefur áhuga á Tevez ef það er í lagi með hausinn á honum

Eini alvöru áhuginn á vandræðagemsanum Carlos Tevez þessa dagana virðist koma frá Ítalíu en bæði Mílanóliðin hafa áhuga á að kaupa Tevez frá Man. City.

Aðstoðarþjálfari AC Milan, Mauro Tassotti, staðfesti í morgun að félagið hefði áhuga á Tevez en myndi fara sér hægt.

"Hann er frábær leikmaður en við yrðum að athuga með líkamlegt og andlegt ástand leikmannsins áður en við gerum einhverja alvöru úr málinu. Menn þurfa að vera í andlegu jafnvægi til þess að spila fótbolta," sagði Tassotti sem var lengi vel varnarmaður hjá félaginu.

Félagi Tassotti í vörn Milan hér á árum áður, Alessandro Costacurta, er mjög spenntur fyrir því að fá Tevez.

"Hann yrði frábær lausn þar sem Cassano verður ekki með næstu mánuði. Samt læðist að manni sá grunur að  vandræði munu banka á dyrnar ef hann þarf að sitja á bekknum. Hann yrði samt fullkominn framherji fyrir Milan."