Cameron: Rétt ákvörðun fyrir Bretland

David Cameron, forsætisráðherra Bretlands, sagði ákvörðun sína um að standa fyrir utan samkomulag leiðtoga Evrópusambandsríkja, um aðgerðir til þess að koma á stöðugleika á Evrópusambandssvæðinu, hafa verið tekna með hagsmuni Bretlands í huga.

„Þetta var rétt ákvörðun fyrir Bretland og mun skipta sköpum til framtíðar," sagði Cameron m.a. í ræðu sinni. Hann sagði ákvörðunina ekki skilja Bretland eftir á köldum klaka í efnahagslegu tilliti, og hún útilokaði heldur ekki frekara samstarf á vettvangi Evrópusamstarfsins. „Þetta þýðir ekki neina einangrun, heldur er einfaldlega rökrétt ákvörðun út frá hagsmunum Bretlands,“ sagði Cameron um ákvörðun sína. Samkomulag náðist hjá 26 þjóðum af 27 um aðgerðir til þess að stuðla að meiri stöðugleika á Evrópusambandsins, þar með talið að gera þjóðum erfiðara um vik að skuldsetja ríkissjóði.

Ed Miliband, leiðtogi Verkamannaflokksins, sagði í ræðu sinni, sem var mótsvar við ávarpi Cameron, að mikil mistök hefðu verið gerð. "Forsætisráðherra hefur gert mestu mistök sem leiðtogi Bretlands hefur gert í Evrópumálum, í heila kynslóð," sagði Miliband. Hann sagði ákvörðun Cameron þýða meiri einangrun og að efnahagslíf landsins gæti lent í erfiðleikum vegna þessarar ákvörðunar, um langa framtíð. Augljóst hefði verið að Cameron hefði verið að taka hagsmuni breskra Íhaldsmanna fram yfir almannahagsmuni.

Hægt er að fylgjast með umræðum breska þinginu, þar sem Cameron ver ákvörðun sína, inn á vefsíðu BBC.