Trifunovic hættur hjá Keflavík

Stuðningsmenn Keflavíkur hafa fengið heldur slæmar fréttir því félagið hefur misst Serbann Lazar Trifunovic.

Trifunovic meiddist nýlega á ökkla og eftir því sem kemur fram á heimasíðu Keflavíkur treystir hann sér ekki til að spila á næstu vikum.

Því komst hann að samkomulagi við stjórn körfuknattleiksdeildar félagsins um að yfirgefa félagið og snúa aftur til síns heimalands.

Trifunovic kom við sögu í sjö leikjum Keflavíkur í Iceland Express deild karla og af þeim vann Keflavík sex. Hann skoraði að meðaltali 25 stig og tók ellefu fráköst.

Trifunovic tók þátt í Stjörnuleik KKÍ fyrir stuttu og var í honum valinn maður leiksins.

Þetta er ekki í fyrsta sinn sem Keflavík missir erlendan leikmann í meiðsli en Bandaríkjamaðurinn Valentino Maxwell fór frá liðinu þar sem að honum gekk illa að ná sér á strik eftir meiðsli.