Gylfi segir launamálin klúður frá upphafi

Forseti ASÍ segir ákvarðanir stjórnvalda sem snúa að launum seðlabankastjóra og annarra háttsettra embættismanna vera klúður frá upphafi. Hann segir lögsókn seðlabankastjóra gagnvart seðlabankanum hafa mjög slæm áhrif á trúverðugleika bankans.

Í fréttum Stöðvar tvö í gærkvöldi var sagt frá því að Már Guðmundsson seðlabankastjóri hafi stefnt Seðlabanka Íslands til að fá launakjör sín leiðrétt en þau voru lækkuð um rúmar þrjú hundruð þúsund krónur með ákvörðun kjararáðs stuttu eftir að hann var ráðinn á grundvelli þess að dagvinnulaun yfirmanna stofnanna og ríkisfyrirtækja megi ekki vera hærri en föst laun forsætisráðherra.

Gylfi Arnbjörnsson forseti ASÍ finnst málið hafa verið klúður frá upphafi. „Ég held að þetta mál sé nú bara frá upphafi hið mesta vandræðamál hvernig var staðið að þessu að hálfu Alþingis og stjórnsýslunnar og það skuli síðan enda með því að seðlabankastjóri fari í mál við Seðlabankann sem augljóslega hefur mjög slæm áhrif á ímynd og trúverðugleika þessarrar stofnunar"

Hann segir það meginskyldu bankaráðs Seðlabankans og seðlabankastjóra að standa vörð um trúverðugleika bankans. Þá hafi til dæmis aðalhagfræðingur seðlabankans verið mjög gagnrýninn út í kjarasamninga á almennum vinnumarkaði. „En svo kemur þessi staða hérna að seðlabankastjóri er í málaferlum um 300 þúsund króna hækkun á sínum kjörum, þetta er ekki í neinu samhengi fyrir þá sem eru áhorfendur að þessu."

Hann vill hins vegar meina að kjararáð hafi ekki heimild til að taka yfir skriflegan ráðningasamning sem búið var að gera áður en það fékk vald til að lækka laun yfirmanna. „Þú getur ekki breytt eftir á skuldbindingum sem stofnanir á vegum ríkisins hafa gengist undir, það er ekki hægt."