KR mætir Snæfelli í bikarnum - 1. deildarlið í undanúrslitin

Það er búið að draga í átta liða úrslitum Powerade-bikars karla og kvenna í körfubolta en dregið var í höfuðstöðvum Vífilfells í dag. Stórleikur átta liða úrslitanna verður viðureign bikarmeistara tveggja síðustu ára, KR og Snæfells, sem munu mætast í DHL-höllinni.

Fjölnir og Tindastóll fengu bæði heimaleik á móti Reykjanesbæjarliðum, Fjölnir á móti Keflavík og Tindastóll á móti Njarðvík.

Það verður einnig stórleikur hjá konunum því tvö efstu lið Iceland Express deildanna, Keflavík og Njarðvík, drógust saman og mætast í Ljónagryfjunni í Njarðvík.

Það er ennfremur ljóst að 1. deildarlið komast í undanúrslit hjá bæði körlum og konum. KFÍ mætir Hamar hjá körlunum og hjá konunum spila Stjarnan og Grindavík en öll þessi lið spila í 1. deild.

Átta liða úrslit Powerade-bikars kvenna

Njarðvík – Keflavík

Fjölnir – Snæfell

Haukar – Hamar

Stjarnan – Grindavík

Átta liða úrslit Powerade-bikars karla

KFÍ – Hamar

Fjölnir – Keflavík

Tindastóll – Njarðvík

KR – Snæfell