Þjóðverjar þrýsta á um þjóðargjaldþrot Grikkja

Þjóðverjar eru farnir að þrýsta á að Grikkland lýsi yfir þjóðargjaldþroti og jafnframt er gert ráð fyrir þeim möguleika að ríkið segji skilið við evrusamstarfið. Frá þessu er greint á fréttavef Daily Telegraph.

Fjármálaráðherra evruríkja munu hittast á mánudaginn til þess að ræða lánafyrirgreiðslur frá Evrópusambandinu og Alþjóðagjaldeyrissjóðnum til Grikkja. Sú lánagreiðsla er reyndar hugsuð til þess að koma í veg fyrir gjaldþrot ríkisins og gefa þeim færi á að koma reglu á fjármál ríkisins.

En niðurskurðaraðgerðir sem krafist er að Grikkjar ráðist í eru gríðarlega miklar og hafa valdið gríðarlega mikilli reiði í landinu. Wolfgang Schäuble, fjármálaráðherra Þjóðverja, telur að ekkert ríki geti ráðið við slíkar aðgerðir.