Hernandez: Viljum vinna alla bikara

Það er óhætt að segja að Evrópudeildin hafi aldrei áður verið eins áhugaverð og í vetur með tilkomu Man. Utd og Man. City. Man. Utd mun spila gegn Ajax á morgun.

Sir Alex Ferguson, stjóri Man. Utd, hefur gefið það út að félagið muni taka keppnina alvarlega og framherjinn Javier Hernandez tekur í sama streng.

"Þarna mætast tvö lið með frábæra sögu sem bæði komust ekki áfram í Meistaradeildinni. Þetta verður áhugaverð rimma," sagði Hernandez.

"Við þurfum að venjast þeirri tilhugsun að við séum ekki lengur í Meistaradeildinni. Við erum Man. Utd og þetta félag vill vinna allar keppnir sem það tekur þátt í."

Hernandez hefur ekki átt eins gott tímabil í fyrra enda verið talsvert meiddur.

"Það hefur verið pirrandi að vera svona mikið meiddur. Það er samt lítið við því að gera. Ég er samt kátur og nýt þess að spila. Það eru forréttindi að spila fyrir Man. Utd og það viðhorf mitt hefur ekkert breyst."