"Bílarnir 2012 eins og Heidi Klum án barms"

Mikil umræða hefur skapast um nýstárlega hönnun F1 bílanna í ár. Ljótur framendi, of mjó dekk og of lítill afturvængur er það sem stingur sérfræðinga sérstaklega í augun.

"Þetta er eins og að ímynda sér Heidi Klum án hennar fallega afturenda og barms," lét Hans-Joachim Stuck hafa eftir sér á dögunum. "Ég vona að minnsta kosti að þeir séu hraðskreðir." Stuck ók í Formúlu 1 á 8. áratugnum og er mögulega stærsti F1 ökumaður sögunnar: Heilir 194 sm.

Paul Hembery, yfirmaður kappakstursmála hjá dekkjaframleiðandanum Pirelli, hefur einnig gagnrýnt bílana og sagði þá "svínslega ljóta" (e. pig ugly). Í samtali við breska götublaðið The Sun sagði hann þetta ljóta útlit hafa fráhrindandi áhrif á nýja áhorfendur og auglýsendur.

Við afhjúpun Ferrari bílsins sagði Luca di Montezemolo, forstjóri Ferrari, að ekki sé til ljótur bíll sem hefur unnið kappakstra. Paul di Resta sló líka á allar efasemdir og benti á að reglubreytingar undanfarinna ára hafa haft mikil áhrif á útlit bílanna og að það sé mjög fljótt að venjast.

Hafa öll liðin sem þegar hafa frumsýnt, að McLaren undanskildu, ákveðið að sætta sig við eins konar "tröppu" fyrir aftan trjónuna. Þetta gera liðin til að forðast að lækka alla hönnun bílsins í kringum trjónuna. McLaren-liðið býr hins vegar svo vel að undanfarin ár hafa þeir hannað lægri bíla en hin liðin. Þeir skarta því ekki rótækum framenda í ár.