Alonso fremstur á síðasta degi æfinga

Fernando Alonso, Spánverjinn knái hjá Ferrari, átti besta tíma dagsins á síðasta æfingadegi Formúlu 1 liða á Jerez-brautinni á Spáni. Tími Alonso er næst besti hringtími settur á Jerez brautinni á 2012-bíl. Það var kalt á Spáni í dag og hafði það veruleg áhrif á æfingar liðanna.

Eins og Vísir greindi frá í gær hefur Pat Fry, tæknistjóri Ferrari liðsins, áhyggjur af stöðu Ferrari-bílsins. Það háir þeim enn þó það hljóti að vera hvatning fyrir liðið að sjá ökumann sinn efstann á loka degi æfinga.

Jean-Eric Vergne á Torro Rosso bíl var annar á æfingunni, þá heimsmeistarinn Sebastian Vettel á Red Bull. Red Bull átti í vandræðum með rafkerfi bílsins og ók Vettel þar af leiðandi aðeins fyrir hádegi. Hamilton var fjórði á McLaren og þá Roman Grosjean á Lotus. Grosjean segir Lotus-bílinn góðann en segir að liðið eigi enn langt í land með að gera hann tilbúinn fyrir keppnistímabilið.

Þó svo að Jarno Trulli á Caterham bíl hafi verið síðastur, og heilum tveimur sekúndum á eftir Bruno Senna á Williams, segir hann þetta vera bestu æfingalotu ferilsins. Trulli hefur nú þriðja tímabil sitt hjá liðinu en hann og liðsfélagi hans Heikki Kovalainen hafa það verðuga verkefni að gera Caterham að sterku liði í Formúlunni. Sú vinna hefur hins vegar reynst erfið og hingað til skilað takmörkuðum árangri.

Kamui Kobayasi á nýja Sauber C31-bílnum varð sjötti á undan Nico Hulkenberg hjá Force India. Hulkenberg snýr aftur eftir árs starf sem þriðji ökumaður Force India en hann þótti standa sig mjög vel í Williams bíl árið 2010. Stóð frammistaða hans í tímatökum fyrir brasilíska kappakstrurinn uppúr þegar hann setti lélegan Williamsbílinn á ráspól.

Liðin leggjast nú yfir gögnin og upplýsingarnar sem þau hafa aflað í vikunni og undirbúa næstu æfingalotu sem verður á Catalunya-brautinni í Barcelona dagana 21.-24. febrúar.