Chisora dæmdur í lífstíðarbann

Breski hnefaleikakappinn Derek Chisora hefur verið dæmdur í ótímabundið keppnisbann af Alþjóðahnefaleikasambandinu og sektaður um 20 milljónir króna.

Chisora gerði allt vitlaust á blaðamannafundum bæði fyrir og eftir bardaga sinn gegn Vitaly Klitschko á dögunum. Hann sló Klitschko á fyrri fundinum og spýtti vatni að bróður hans, Vladimir sem einnig er boxari.

Eftir bardagann lenti hann svo í orðaskaki við David Haye, annan breskan hnefaleikakappa, sem leiddi svo til slagsmála.

Chisora var handtekinn ef lögreglunni í Þýskalandi vegna þessa en bardaginn fór fram í München. Honum var síðar sleppt án kæru.

Í yfirlýsingu frá sambandinu segir að hegðun Chisora væri óásættanleg og að annað eins hafi vart sést hjá hnefaleikakappa í gegnum tíðina.