Fatlaður bróðir Hamiltons fetar í spor bróður síns

Breska ríkissjónvarpið sýndi á dögunum heimildamyndina "Racing with the Hamiltons: Nic in the driving seat". Hún fjallar um hvernig bróðir Formúlu 1 ökuþórsins Lewis Hamilton framkvæmir það sem hann hélt að væri sér ávalt ókleift.

Myndin fjallar um það hvernig fatlaður bróðir Lewis Hamilton, hinn tvítugi Nic Hamilton, fær tækifæri til að uppfylla draum sinn um að feta í fótspor eldri bróður síns og gerast kappakstursökumaður. Sú leið er hins vegar erfið og margar hindranir í vegi hans.

Kvikmyndagerðarmennirnir fengu nánast óheftan aðgang að Hamilton fjölskyldunni allt síðasta sumar þegar Nic ók sitt fyrsta tímabil í Renault Clio bikarkeppninni í Bretlandi. Nic hefur náð þeim frábæra árangri að fá annað tækifæri í mótaröðinni í ár.

Stórskemmtileg og fræðandi mynd sem veitir innsýn inn í fjölskyldulíf eins besta ökumanns í heimi.

Myndskeiðið með fréttinni er af þeim bræðrum í keppni við Jake Humphrey í upphitunarþætti BBC fyrir ítalska kappaksturinn 2010.