Joe Hart: Ég trúi þessu ekki

Joe Hart, markvörður Manchester City, var nálægt því að tryggja Manchester City sæti í átta liða úrslitunum Evrópudeildarinnar í kvöld en skalli hans í lok uppbótartíma fór rétt framhjá og Sporting Lissabon komst áfram á fleiri mörkum á útivelli.

„Ég trúi þessu ekki," sagði Joe Hart eftir leikinn en hann hafði stolist fram í hornspyrnu þegar fimm mínútur voru liðnar af uppbótartímanum. Manchester City lenti 2-0 undir í fyrri hálfleik en skoraði þrjú mörk í seinni hálfleiknum.

„Stuðningsmennirnir voru frábærir í seinni hálfleik. Núna verðum við bara að spila vel í hverjum leik því við megum ekki tapa fleiri leikjum. Við getum tekið það jákvæða út úr þessum leik því við erum með frábært lið og þurfum ekki að hafa neinar áhyggjur," sagði Joe Hart.

Manchester City getur þar með farið að einbeita sér að baráttunni um Englandsmeistaratitilinn við nágrannanna í Manchester United sem féllu líka úr leik í kvöld.