Mourinho: Vonandi verður dómarinn ekki í aðalhlutverki

José Mourinho, þjálfari Real Madrid, ætlar sér að sitja límdur við skjáinn í kvöld þegar fyrri leikur AC Milan og Barcelona í átta liða úrslitum Meistaradeildarinnar fer fram.

Mourinho vonast til þess að dómarinn muni ekki hafa nein úrslitaáhrif í leiknum.

"Ég vona að þetta verði fallegur leikur og við munum ekki tala um dómarann í lok leiksins," sagði portúgalski þjálfarinn.

Kaká, leikmaður Real Madrid og fyrrum leikmaður Milan, bíður einnig spenntur eftir leiknum.

"Ég mun styðja Milan eins og alltaf. Enginn af fyrrum félögum mínum þar hefur hringt í mig enn sem komið er út af leiknum en liðið veit líka við hverju er að búast. Ég vona að Milan spili vel og nái góðum úrslitum," sagði Kaká.