Unnið með skrímslum og legógeimskipum hjá CCP

Höfustöðvar tölvuleikjaframleiðands CCP eru ævintýralegur vinnustaður þar sem skrímsli, tæknilegó, fiskar, rafmagnstrommusett og spilakassar, svo eitthvað sé nefnt, setja mark sitt á vinnuumhverfið.

Í nýjum lið á Vísi.is, heimsókn á vinnustaði, má nú sjá Torfa Frans Ólafsson (creative director), sem starfað hefur hjá CCP frá upphafi, lýsa starfsumhverfi, verkferlum og áherslum í rekstri, en Sigurjón Ólafsson, myndatökumaður, fylgdi honum eftir þegar hann lýsti því sem fyrir augu bar. „Það að komast á forsíðu PC Gamer var fyrir okkur tölvunördana líklega eins og fyrir Ásdísi Rán að komast í Playboy," segir Torfi m.a. um viðurkenningu sem hangir upp á vegg í fyrirtækinu, sem hann kallar „montvegg".

Verkferlar í fyrirtækinu eru nokkuð framúrstefnulegir miðað við mörg önnur fyrirtæki, en það setur verulegt mark sitt á fyrirtækið að það starfi víðs vegar um heiminn, m.a í Shanghai, Newcastle í Bretlandi og Atlanta í Bandaríkjunum.

Sjá má upptöku af heimsókninni til CCP hér, eða í myndbandinu sem fylgir fréttinni.