Lagarde harðorð í garð Grikkja

Ljóst er að ekki er tekið út með sældinni að búa í Grikklandi um þessar mundir. Ríkið þiggur neyðaraðstoð frá Evrópusambandinu og Alþjóðagjaldeyrissjóðnum með nokkuð ströngum skilyrðum.

Það helsta er, að skera niður ríkisútgjöld, við takmarkaða hrifningu Grikkja en skert ríkisútgjöld þýða skerta þjónustu.

Framkvæmdastjóri Alþjóðagjaldeyrissjóðsins, hin franska Christine Lagarde, hefur skilaboð fyrir Grikki sem þurfa að sætta sig við skerta opinbera þjónustu um þessar mundir.

Hún segir að hún hafi meiri samúð með börnum í Afríku sunnan Sahara, sem ekki geta menntað sig, en þeim íbúum Aþenu sem lifa nálægt fátæktarmörkum.

Í viðtali við breska dagblaðið Guardian segir hún að Alþjóðagjaldeyrissjóðurinn hafi engin áform um að slaka á kröfum sínum til Grikkja. Niðurskurðarhnífurinn verði áfram á lofti með sama slagkrafti og verið hefur.