Hrun á markaðsvirði Facebook - allra augu á Morgan Stanley

Augu fjárfesta í Bandaríkjunum beinast nú að Morgan Stanley, helsta viðskiptabanka Facebook, en markaðsvirði Facebook hefur verið í frjálsu falli í dag. „Skráningarverðið hefði átt að vera helmingurinn af því sem það var," segir Michael Pachter, greinandi hjá fyrirtækinu Wedbush Securites, í viðtali við Wall Street Journal.

Forvarsmenn Morgan Stanley hafa ekkert tjáð sig um þróunina á hlutabréfamörkuðum í dag, en áhyggjur fjárfesta beinast öðru fremur að því að verðmöt á fyrirtækinu hafi tekið mið af óskhyggju þeirra sem voru hluthafar fyrir skráningu, fremur en eðlilegu mati á rekstri fyrirtækisins.

Reksturinn hefur þó ekki verið þungur, síður en svo. Í fyrra hagnaðist Facebook um ríflega einn milljarða dala, en heildartekjur námu um 3,2 milljörðum dala, sem jafngildir um 403 milljörðum króna.

Markaðsvirðið við skráningu nam hinsvegar ríflega 104 milljörðum dala, eða sem nemur meira en hundraðföldum árlegum hagnaði.

Markaðsvirði Facebook er nú ríflega 85 milljarðar dala, en gengi félagsins lækkaði um ríflega 11 prósent í dag, á meðan Nasdaq vísitalan hækkaði skarplega, eða um 2,4 prósent.