Fjárfestar óttast áhlaup á evrópska banka

Fjárfestar óttast áhlaup á evrópska banka, einkum þá sem eru með höfuðstöðvar í Suður-Evrópu, að því er greint er frá í helgarútgáfu Wall Street Journal. Þrátt fyrir að Seðlabanki Evrópu hafi lánað evrópskum bönkum ríflega þúsund milljarða evra, liðlega 166 þúsund milljarða króna, í lok síðasta árs og byrjun þessa árs, þá hefur áhyggjum fjárfesta ekki verið eytt. Lánin voru veitt á lægri vöxtum en bönkum bauðst á markaði, til þriggja ára, einkum til þess að þeir gætu endurfjármagnað skuldir ríkissjóða í Evrópu.

Í Wall Street Journal segir að óróinn meðal fjárfesta hafi orðið augljós þegar fréttir bárust af því að Grikkir hefðu tekið út meira en 700 milljónir evra á einum degi í síðustu viku, sem er margfalt meira en sem nemur meðaltalsúttekt á degi hverjum.