Birgir Leifur komst ekki í gegnum niðurskurðinn

Kylfingurinn Birgir Leifur Hafþórsson spilaði annan hringinn á Kärnten Golf Open mótinu í Austurríki á þremur höggum yfir pari og komst ekki í gegnum niðurskurðinn.

Skagamaðurinn lauk leik í dag á 75 höggum og var samanlagt á þremur höggum yfir pari eftir hringina tvo. Enn eiga fjölmargir kylfingar eftir að ljúka keppni en líklegt er að spila þurfi á tveimur höggum undir pari til þess að komast áfram.

Birgir Leifur lék fyrsta hringinn í gær á pari. Ljóst var að Birgir Leifur þyrfti að spila enn betur í dag til að komast áfram á seinni tvo hringina. Fjórir skollar á fyrstu átta holunum bentu til þess að það tækist ekki sem varð raunin.

Birgir Leifur sigraði á fyrsta móti sumarsins í Eimskipsmótaröðinni fyrir tæpum tveimur vikum. Annað mót sumarsins fer fram í Eyjum um helgina.