Forráðamenn Milan hringdu brjálaðir í Zlatan

Eins og við mátti búast ollu ummæli Zlatan Ibrahimovic um bágan fjárhag AC Milan usla og voru forráðamenn félagsins allt annað en sáttir við Svíann.

Zlatan sagði að fjárhagsstaða Milan væri svo slæm að félagið myndi ekki geta keypt neina hágæðaleikmenn í sumar.

Milan varð í kjölfarið að bera þessar fregnir til baka og segja að leikmaðurinn færi með rangt mál.

"Ég fékk símtöl frá forráðamönnum Milan og við erum búnir að hreinsa loftið. Eftir öll þessi ár í boltanum er ég orðinn vanur slíkum uppákomum. Nú verður þetta lagt til hliðar og horft fram á veginn," sagði Zlatan.