Álverð lækkað um 30 prósent á einu ári

Álverð samkvæmt opinberum upplýsingum London Metal Exchange (LME) hefur lækkað um ríflega 30 prósent frá því í júlí í fyrra. Staðgreiðsluverð á markaði fór þá í 2.600 dali á tonnið en verðið er nú 1.879 dalir, samkvæmt upplýsingum um síðasta markaðsverð á vefsíðu LME. (sjá hér).

Hrávöruverð hefur verið að lækka töluvert að undanförnu, eftir skarpa hækkun milli áranna 2010 og 2011. Þannig hækkaði álverð úr tæplega 1.900 dölum á tonnið í júní 2010 í ríflega 2.600 dali í júlí 2011, en það hefur nú fallið nær alveg í sama farið síðan.

Álverð hefur umtalsverð áhrif á íslenskan efnahag, vegna álveranna þriggja, Rio Tinto Alcan í Straumsvík, Alcoa Fjarðaáls við Reyðarfjörð og Century Aluminum Norðuráls á Grundartanga. Orkuverð álfyrirtækjanna til Landsvirkjunar tekur mið af álverði í stærstum hluta þeirra samninga sem fyrirtækið er með álfyrirtækin, og það sama á við um Orkuveitu Reykjavíkur og HS Orku.

Virði afurða orkufreks iðnaðar, sem að mestu er ál, var ríflega 80 milljarðar í fyrra og nam 43,7 prósentum af heildarvirði vöruútflutnings landsins samkvæmt Hagstofu Íslands.