Heimir: Ég man að Gummi Ben skoraði frábært mark

FH-ingar mæta AIK á Råsunda-leikvanginum í Solna í 2. umferð forkeppni Evrópudeildarinnar í knattspyrnu ytra í dag. FH-ingar æfðu á vellinum í gær en Fréttablaðið náði tali af Heimi Guðjónssyni, þjálfara liðsins, að henni lokinni.

„Þetta er frábær völlur sem tekur 36 þúsund manns. Ég tók eftir því að menn eru orðnir spenntir að taka þátt í þessu," sagði Heimir um Råsunda-leikvanginn.

„Það fer hver að vera síðastur að spila á þessum glæsilega velli því hann verður rifinn eftir tímabilið. Það á að byggja nýjan leikvang sem tekur um 50 þúsund áhorfendur. Þetta er flott og allar aðstæður til fyrirmyndar."

FH-ingar töpuðu nokkuð óvænt 3-1 gegn Valsmönnum í Pepsi-deild karla á sunnudagskvöldið. Heimir var ósáttur með sína menn í þeim leik.

„Sá leikur var afgreiddur á mánudaginn. Það voru auðvitað vonbrigði að tapa honum en nú er ný áskorun að spila leik gegn sterku liði AIK. Liðið er vel skipulagt og með hættulega menn frammi. Þetta er verðugt verkefni fyrir FH," segir Heimir.

Miðvörðurinn Freyr Bjarnason fór meiddur af velli í fyrri hálfleik gegn Valsmönnum og munaði um minna hjá FH-ingum. FH-ingar leiddu 1-0 þegar Freyr fór af velli en töpuðu eins og áður segir 3-1.

„Við erum að tjasla honum saman. Hann var með á æfingunni svo ég reikna með því að hann verði leikfær á morgun. Aðrir eru heilir og allir klárir," segir Heimir sem hefur sé tvo leiki AIK liðsins á DVD-mynddiskum.

„Það er ljóst að við erum að spila við sterkt lið og þurfum að verjast vel, vera klókir í varnarleiknum. En við þurfum líka að halda boltanum innan liðsins á ákveðnum tímapunktum. Það þýðir ekki að liggja í vörn í 90 mínútur og hlaupa. Við þurfum að stríða þeim sóknarlega líka. Við höfum öfluga menn í sóknarlínunni og eigum að geta strítt þeim þar," segir Heimir sem á ekki von á öðru en að íslenski landsliðsmaðurinn Helgi Valur Daníelsson verði í byrjunarliði Svíanna.

Heimir lék með KR-ingum sem mættu AIK í Evrópukeppni bikarhafa árið 1996. Þá féll liðið úr keppni samanlagt 2-1.

„Ef ég man þetta rétt töpuðum við fyrri leiknum heima 1-0. Vorum pínu klaufar að ná ekki jafntefli. Svo man ég að Gummi Ben skoraði frábært mark í leiknum úti og við áttum einhverja möguleika en tókst ekki að klára þá," segir Heimir og leggur áherslu á að fá úrslit sem gefi liðinu möguleika í seinni leiknum í Kaplakrika að viku liðinni.