David Haye: Vitali Klitschko þorir ekki að mæta mér í hringnum

Enski hnefaleikakappinn David Haye skýtur föstum skotum á Vitali Klitschko í fjölmiðlum og telur að sá úkraínski þori ekki að mæta honum í hringnum.

Haye bar sigur úr býtum gegn Dereck Chisora um helgina og það með miklum yfirburðum en hann telur það vera ástæðuna fyrir því að Klitschko vilji ekki mæta honum.

Haye, sem er 31 árs, sagði á blaðamannafundi að hann væri einfaldlega í of góðu formi þessa daganna og Klitschko ætti ekki möguleika gegn honum.

„Vitali vill ekki berjast við mig. Það sáu allir hvað ég gerði gegn Chisora. Af hverju ætti 40 ára gamall maður að berjast við eins ungan, ferskan og öflugan hnefaleikamann eins og ég?," sagði Haye.

„Ég get lofað ykkur því að hann mun gera allt til þess að komast frá því að berjast við mig, enda mikill stjórnmálamaður í eðli sínu," sagði Haye og hló.