Julio Cesar ekki í Evrópudeildarhópi Inter

Julio Cesar og Giampaolo Pazzini voru ekki valdir í leikmannahóp Inter í Evrópudeildinni í vetur. Flest bendir til þess að þeirra tími sem lykilmenn í liði Inter sé liðinn.

Cesar vissi líkast til að byrjunarliðssæti hans heyrði sögunni til þegar Inter keypti Samir Handanovic frá Udinese. Brasilíumaðurinn, sem varð Evrópumeistari með Inter árið 2010, hefur þótt einn sá færasti í faginu undanfarinn áratug.

Pazzini hefur í lengri tíma verið orðaður við brottför frá Inter. Sá orðrómur fékk aldeilis byr undir báða vængi eftir tíðindi dagsins.

Auk þess að tilkynna leikmannahóp sinn í Evrópudeildinni í vetur var Gabi Mudingayi kynntur til sögunnar hjá Inter. Miðjumaðurinn kemur úr herbúðum Bologna.