Yang leggur spaðann á hilluna | Þjálfara og fyrirkomulagi kennt um

Heimsmeistari kvenna í badminton, Yu Yang frá Kína, hefur lagt spaðann á hilluna. Ákvörðunina tók hún eftir að henni var vikið úr badmintonkeppni Ólympíuleikanna ásamt sjö öðrum keppendum sem reyndu vísvitandi að tapa leikjum sínum í tvíliðaleik kvena.

Óhætt er að fullyrða að tvíliðaleikur í badmintonkeppni kvenna hafi aldrei fengið jafnmikla athygli og á leikunum í London. Í tveimur leikjum riðlakeppninnar á þriðjudag kom upp sú einkennilega staða að öll pörin fjögur vildu tapa.

Yu Yang og liðsfélagi hennar Wang Xiaoli, sem þóttu líklegastar til sigurs á leikunum í tvíliðaleikskeppni kvenna, voru eitt paranna sem sent var heim. Auk þeirra fékk annað kínverskt par, par frá Indónesíu og par frá Suður-Kóreu reisupassann.

„Mér finnst þetta mjög ósanngjarnt. Í fyrsta lagi er það fyrirkomulagið sem er vandamálið. Það er mitt mat," segir Kínverjinn Xu Chen sem keppir ásmat Ma Jin í úrslitum í tvenndarleik á morgun.

Fyrirkomulagi badmintonkeppninnar var breytt fyrir yfirstandandi Ólympíuleika. Í stað hefðbundinnar útsláttarkeppni var keppendum skipt í riðla. Lokastaðan í riðlinum réð því hver andstæðingurinn yrði í útsláttarkeppninni þar sem kínversku pörin reyndu að forðast hvort annað. Að sama skapi reyndu pörin frá Suður-Kóreu og Indónesíu að forðast að mæta kínversku pörunum.

„Ég mun hvetja hana (Yu Yang) til að halda áfram keppni. Þrátt fyrir það sem gerðist var of mikið að vísa þeim úr keppni. Stelpurnar hafa lagt svo hart að sér undanfarin fjögur ár," segir Wang Xin næstefsta kona heimslistans.

Kastljósið hefur ekki síst beinst að þjálfara kínverska liðsins sem horfði upp á landsliðsmenn sína senda fokkuna viljandi í netið hvað eftir annað.

Kínverski ríkisfjölmiðillinn Xinhua tekur upp hanskann fyrir leikmennina og skellir skuldinni á þjálfarann.

„Það á ekki að refsa kínversku leikmönnunum. Aðalþjálfarinn, Li Yongbo, er höfuðástæða þess að þessi leið var farin á leikunum," segir í frétt fjölmiðilsins.

Xu Chen, sem leikur í úrslitaleik tvenndarleiksins á morgun, fagnaði sigrinum í undanúrslitum með handabendingum til þjálfara síns í stúkunni. Ekki var að sjá að kínversku keppendurnir væru ósáttir við þjálfara sinn.

„Ég veit ekkert hvað er að gerast í Kína í augnablikinu. Ég einbeiti mér alfarið að leik mínum. En auðvitað styð ég Li og geri áfram. Hann er aðalþjálfarinn okkar eftir allt saman," segir Xu sem ásamt Wang Xiaoli mætir löndum sínum Zhang Nan og Zhao Yunlei í úrslitum tvenndarleiksins.