Tollastríð að skella á milli Norðmanna og ESB

Tollastríð virðist skollið á milli Noregs og Evrópusambandsins en það eru einkum Danir sem vilja að Norðmönnum verði refsað vegna fyrirhugaðra ofurtolla þeirra á landbúnaðarvörur.

Það er greinilegt að Danir eru búnir að fá upp í kok af grönnum sínum Norðmönnum vegna þeirra tolla sem Norðmenn hafa sett á til þess að verja hag norskra bænda. Í vor settu Norðmenn á háa tolla á innflutt skrautblóm sem kostuðu danska garðyrkjubændur miklar upphæðir í töpuðum tekjum. Þessir blómatollar blikna þó og blána í samanburði við þá tolla sem Norðmenn ætla að setja á kjötinnflutning til landsins.

Þannig eiga tollar á innflutt lambakjöt að verða 429% og tollar á nautakjöt verða 344%. Þá eiga tollar á osta að verða 277%, en hér er osturinn Gamle Ole þó undanskilinn sem áfram er tollfrjáls.

Þetta hefur kallað fram hörð viðbrögð hjá Piu Olsen Dyhr viðskiptaráðherra Danmerkur. Pia segir að áform Norðmanna séu óásættanleg og boðar refsiaðgerðir gegn þeim.

Í samtali við Jyllands Posten gefur Pia í skyn að fyrstu skrefin verði að setja á tolla á eldislax sem Norðmenn flytja til Evrópusambandsins en sambandið er mikilvægasti markaður Norðmanna fyrir þá afurð.