NFL: Colts-liðið vann dramatískan sigur fyrir veikan þjálfara sinn

Indianapolis Colts kom öllum á óvart með dramatískum sigri á Green Bay Packers í ameríska fótboltanum í gær. Atlanta Falcons liðið hélt sigurgöngu sinni áfram og Drew Brees bætti 52 ára met Johnny Unitas í flestum leikjum í röð með snertimarkssendingu.

Indianapolis Colts var án þjálfara síns Chuck Pagano sem greindist með hvítblæði á dögunum og lenti einnig 3-21 undir í leiknum á móti Green Bay Packers. Nýliðinn Andrew Luck leiddi hinsvegar sitt lið aftur inn í leikinn og útherjinn Reggie Wayne, mikill vinur Chuck Pagano til margra ára, átti stórleik og skoraði meðal annars sigur-snertimarkið. Leikmenn Colts-liðsins tileinkuðu sigurinn veikum þjálfara sínum og dramatíkin var mikil í Indianapolis í gær.

Drew Brees, leikstjórnandi New Orleans Saints, bætti 52 ára met Johnny Unitas þegar hann náði að senda snertimarkssendingu í 48. leiknum í röð. Brees náði metinu með því að senda á Devery Henderson en auk þess sendi hann þrjár aðrar snertimarkssendinga í leiknum sem Saints-liðið vann 31-24.

Atlanta Falcons vann útisigur á Washington Redskins og er enn ósigrað í deildinni. Houston Texans hefur einnig unnið alla leiki sína en spilar fimmta leikinn sinn á móti New York Jets í nótt í lokaleik fimmtu umferðarinnar.

Baltimore Ravens, Minnesota Vikings, Chicago Bears og San Francisco 49ers unnu öll leiki sína í gær og hafa þar með unnið 4 af fyrstu 5 leikjum sínum á tímabilinu. San Francisco 49ers hefur unnið tvo síðustu leiki sína með 34 (34-0 á móti New York Jets) og 42 stiga mun (45-3 á móti Buffalo Bills).

Úrslitin í NFL-deildinni í gær:

Washington Redskins - Atlanta Falcons 17-24

Pittsburgh Steelers - Philadelphia Eagles 16-14

Indianapolis Colts - Green Bay Packers 30-27

New York Giants - Cleveland Browns 41-27

Cincinnati Bengals - Miami Dolphins 13-17

Kansas City Chiefs - Baltimore Ravens 6-9

Carolina Panthers - Seattle Seahawks 12-16

Jacksonville Jaguars - Chicago Bears 3-41

Minnesota Vikings - Tennessee Titans 30-7

New England Patriots - Denver Broncos 31-21

San Francisco 49Ers - Buffalo Bills 45-3

New Orleans Saints - San Diego Chargers 31-24