Tebow gæti verið notaður sem hlaupari um helgina

Bandaríska íþróttaundrið Tim Tebow er engum líkur. Hann sló gegn sem leikstjórnandi hjá Denver Broncos síðasta vetur en hefur brugðið sér í allra kvikinda líki hjá NY Jets í vetur.

Jets fékk Tebow til liðs við sig í sumar og hefur hann mátt sætta sig við að vera varaskeifa fyrir Mark Sanchez í leikstjórnandastöðunni.

Hann hefur þó fengið ýmislegt að gera. Hann hefur hlaupið með sérliðinu og stillt sér upp sem útherji enda fengið að kasta sjaldan.

Mikið meiðsli hrjá nú Jets-liðið og til greina kemur að nota Tebow sem hlaupara um helgina. Kappinn er mikill vexti og fílhraustur. Hann gæti því mögulega leyst það eins og flest annað.

"Þetta er möguleiki sem við erum að skoða. Tim þekkir allar stöður vallarins og ég treysti honum til þess að leysa allar stöður," sagði Rex Ryan, þjálfari Jets.

Jets spilar við öflugt lið New England Patriots um helgina og þjálfari Patriots, Bill Belichick, segir að Tebow sé góður hlaupari eins og hann hefur margoft sýnt er hann spilar stöðu leikstjórnanda.

"Hann er góður hlaupari og virkilega sterkur. Hann er líka útsjónarsamur og getur gert ótrúlega hluti," sagði Belichick.