Mál Arons skýrast eftir leikinn gegn Sviss

Lars Lagerbäck landsliðsþjálfari Íslands í fótbolta segir enga ákvörðun vera tekna með mál fyrirliðans Arons Einars Gunnarssonar fyrr en eftir landsleikinn gegn Sviss á þriðjudaginn. Aron lét hafa eftir sér óheppileg ummæli um Albaníu á vefmiðlinum fotbolti.net sem hafa dregið dilk á eftir sér.

„Ég ræddi við Aron og hef talað við Geir og Þóri (formann og framkvæmdarstjóra KSÍ) og við viljum ekki ræða þetta núna heldur einbeita okkur að leiknum gegn Sviss," sagði Lars Lagerbäck á blaðamannfundi eftir hádegið.

„Mín skoðun er að ef leikmaður gerir mistök eins og Aron gerði þá er ekki hægt að hlaupast undan því. Mér fannst hann bregðast vel við, hann gerði mistök, viðkenndi þau og baðst afsökunar.

„Ég reyni að hafa eins fáar reglur og ég get. Menn eru í landsliði og vita hvernig þeir eiga að haga sér. Ef maður er með reglur þá þarf maður að refsa í sífellu og ég vona að menn axli ábyrgð á sinni hegðun hver og einn. Ef menn gera mistök þá geta menn lært af þeim.

„Við megum ekki gleyma því að margir þessara leikmanna eru ungir menn og segja stundum hluti sem þeir meina ekkert með.

„Ég ræddi við leikmenn eftir leikinn í Albaníu og ítrekaði að menn verði að hugsa um hvað þeir segja og að þeir eru opinberara persónur. Því meira sem sem liðið vinnur þá eykst athyglin á þá og þeir eiga það skilið því þeir hafa staðið sig mjög vel.

„Ef menn læra ekki af mistökum sínum og axla ekki ábyrgð á eigin hefðun þá eiga þeir ekkert erindi í landsliðið. Menn mega gera mistök, ég hef gert mörg mistök á lífsleiðinni en geri vonandi ekki eins mörg nú orðið," sagði Lars með bros á vör.

„Við förum betur yfir þetta eftir leikinn gegn Sviss," sagði Lars að lokum.