Mun spara mikinn pening er Stern hættir

Mark Cuban, eigandi Dallas Mavericks, grætur krókódílatárum yfir því að David Stern sé að hætta sem yfirmaður NBA-deildarinnar. Þeirra samskipti hafa alla tíð verið erfið.

"Ég sé fram á að spara mér mikinn pening í framtíðinni," sagði Cuban léttur en Stern hefur verið duglegur við að sekta Cuban fyrir hörð ummæli og hegðun í gegnum tíðina.

"Að öllu gríni slepptu verður þetta ekki eins án hans. Hann hefur svo sannarlega sett mark sitt á deildina. Hans fingraför eru á öllum hlutum sem skipta máli í deildinni.

"Ég er viss um að Adam Silver eigi eftir að standa sig vel í starfinu. Nú þarf að taka ákvörðun um hvaða bikar við nefnum eftir David. Ég legg til að sektarbikar ársins fái hans nafn en það verður víst ekki mín ákvörðun."