Mörkin hans Messi orðin 88

Lionel Messi heldur áfram að bæta markamet Þjóðverjans Gerd Müller. Messi skoraði tvíveigis í 2-0 sigri Barcelona á Cordoba í fyrri leik liðanna í spænska Konungsbikarnum í kvöld.

Cordoba leikur í b-deildinni á Spáni og hafði þjálfari liðsins lýst því yfir fyrir leik að hann væri ráðalaus hvernig hans lið ætti að stöðva Argentínumanninn snjalla.

Messi skoraði fyrra markið strax á 11. mínútu og bætti við því seinna, eins og hann gerir oftar en ekki, í síðari hálfleik. Messi hefur nefnilega oftar skorað tvö mörk í leik með Barcelona á árinu 2012 en eitt mark.

Liðin mætast öðru sinni í Barcelona í næstu viku.

Messi hefur nú skorað 88 mörk á almanaksárinu 2012 en á sunnudaginn bætti hann 40 ára gamalt met Þjóðverjans Gerd Müller. Þýski framherjinn skoraði 85 mörk árið 1972.