Clippers er heitasta liðið í NBA-deildinni

LA Clippers er á mikilli siglingu í NBA-deildinni um þessar mundir og liðið vann í nótt sinn 13. leik í röð. Að þessu sinni valtaði liðið yfir Phoenix.

Þessir 13 sigrar í röð eru félagsmet. Liðið var þess utan að vinna sinn sjötta útileik í röð en það er einnig félagsmet.

"Þetta er líklega besta lið deildarinnar í dag," sagði Alvin Gentry, þjálfari Phoenix, eftir flengingu næturinnar.

Blake Griffin skoraði 23 stig fyrir Clippers, Jamal Crawford 22 og Chris Paul skoraði 17 stig og gaf 13 stoðsendingar.

Úrslit:

Brooklyn-Philadelphia 95-92

NY Knicks-Minnesota 94-91

Orlando-Utah 93-97

San Antonio-Dallas 129-91

Phoenix-LA Clippers 77-103

Sacramento-Portland 108-96