Isco kjörinn sá efnilegasti í Evrópu

Spænski miðjumaðurinn Isco hjá Malaga var í gær kjörinn besti ungi leikmaður Evrópu í árlegu kjöri ítalska dagblaðsins Tuttosport. 30 blaðamenn frá dagblöðum í tuttugu löndum álfunnar greiddu atkvæði í kjörinu.

„Ég er í skýjunum. Þetta er stórkostlegt. Þegar ég skoða listann yfir fyrri verðlaunahafa fæ ég hroll. Þar eru nöfn í hæsta gæðaflokki eins og t.d. Messi," sagði Isco við Tuttosport.

„Verðlaunin eru hvatning til mín um að verða alþjóðleg stjarna líkt og þeir sem hlotið hafa titilinn á undan mér," sagði Isco.

Isco fékk 137 atkvæði í kjörinu en Stephan El Shaarawy varð annar með 125 atkvæði. Thibaut Courtois, markvörður Chelsea sem er í láni hjá Atlético Madrid, hafnaði í þriðja sæti með 116 atkvæði.

Isco skoraði fyrsta mark leiksins í 3-2 sigri Malaga á Real Madrid í gærkvöldi.

Fyrri verðlaunahafar

2003 Rafael van der Vaart

2004 Wayne Rooney

2005 Lionel Messi

2006 Cesc Fàbregas

2007 Sergio Agüero

2008 Anderson

2009 Alexandre Pato

2010 Mario Balotelli

2011 Mario Gotze

2012 Isco