Hildur ætlar að harka af sér í kvöld

KR og Snæfell mætast í DHL-höllinni í kvöld í einum af úrslitaleikjunum um sæti í úrslitakeppni Iceland Express-deildar kvenna en liðin mega ekkert gefa eftir ætli þau að vera með í úrslitakeppninni í ár.

Hildur Sigurðardóttir, fyrirliði Snæfells, meiddist illa á ökkla í sigri liðsins á Haukum í síðustu viku og það var óvíst hvort hún yrði með á móti sínum gömlu félögum í kvöld.

„Ég held að Ingi [Þór Steinþórsson, þjálfari] sé farinn að hafa meiri áhyggjur af Öldu," sagði Hildur aðspurð um meiðslin en hinn reynsluboltinn í Snæfellsliðinu, Alda Leif Jónsdóttir, glímir einnig við meiðsli. „Ég er að verða fín. Ég var voða lítið með á æfingu í gær en ég veit alveg að ég get gert allt. Ég verð bara að fara varlega fram að leik því ég verð aum ef ég fer að gera eitthvað af alvöru," sagði Hildur og hún ætlar að harka af sér.

„Þetta er mjög mikilvægur leikur og ég er búin að gera allt til að ná bólgunni úr þessu. Það er búin að vera mikil vinna," viðurkennir Hildur en hún er þekkt fyrir að harka af sér inni á vellinum og láta ekki meiðsli stoppa sig þegar mikið liggur við.

Haukar, KR og Snæfell eru öll með 24 stig í sætum 3 til 5, þökk sé sigri Snæfells í umræddum leik gegn Haukum í síðustu umferð en fjögur efstu liðin komast í úrslitakeppnina. Snæfell þarf að vinna leikinn með fimm stigum til þess að ná betri innbyrðisstöðu á móti KR. KR vann sína leiki með 7 og 2 stigum en Snæfell vann síðan þriðja leikinn með 5 stigum.

Þrír aðrir leikir fara einnig fram í deildinni í kvöld. Topplið Keflavíkur heimsækir Val, Haukar taka á móti botnliði Fjölnis og Hamar fær bikarmeistara Njarðvíkur í heimsókn. Allir leikirnir hefjast kl. 19.15.