Uppgjör milli Tals og Vodafone fyrir dómstóla

Uppgjör á reikningum vegna gagnaflutnings og innsláttar pantana sem Vodafone telur Tal hafa vangreitt er á leið fyrir dómstóla. Verði lyktir málsins Vodafone í vil mun það kosta Tal 119 milljónir króna auk vaxta. Þetta kemur fram í ársreikningi IP-fjarskipta, móðurfélags Tals, og skráningarlýsingu Vodafone.

Tal tapaði 93 milljónum króna í fyrra og eigið fé félagsins var neikvætt um 169 milljónir króna um síðustu áramót. Tal hefur því tapað um milljarði króna á árunum 2008 til 2012. Skuldir þess jukust úr 638 milljónum króna í 803 milljónir króna á árinu 2011. Þar af gengst móðurfélag IP-fjarskipta í sjálfsskuldarábyrgð fyrir skammtímaláni upp á 50 milljónir króna. Eigendur IP-fjarskipta eru Auður fagfjárfestasjóður 1, sem á 95 prósent, og Kjartan Örn Ólafsson.

Í ársreikningnum kemur fram að töluverð óvissa sé um rekstrarhæfi Tals á þessu ári sem gæti „hugsanlega haft þær afleiðingar að félagið geti ekki selt eignir sínar og greitt skuldir við eðlileg rekstrarskilyrði."

Deila um uppgjörAuk þess stendur yfir deila á milli Tals og Vodafone um uppgjör krafna sem leystar verða fyrir dómstólum. Verði niðurstaðan Tali í óhag mun 119 milljóna króna skuldbinding lenda á félaginu til viðbótar við það sem þegar er tilgreint í ársreikningi.

Viktor Ólason, forstjóri Tals, segir stöðuna hafa batnað á fyrri hluta þessa árs. Hagnaður fyrir afskriftir, fjármagnskostnað og skatta (EBITDA) hafi verið 104 milljónir króna en heildarniðurstaða rekstursins fæst ekki uppgefin hjá honum.

Tal hefur verið í mikilli auglýsingaherferð á undanförnum mánuðum þar sem viðskiptavinum er boðið tíu gígabæta gagnamagn fyrir 500 krónur. Að sögn Viktors hafa um fjögur þúsund nýir viðskiptavinir gengið til liðs við félagið eftir að það hóf að bjóða umrætt tilboð. Aðspurður um aðfinnslur endurskoðanda félagsins í ársreikningi, um óvissu um rekstrarhæfi félagsins, segir Viktor þetta vera hefðbundna athugasemd, enda sé félagið með neikvætt eigið fé þannig.

Farnir til SímansTal, sem á ekki sitt eigið dreifikerfi og leigir því aðgang að kerfum annarra, tilkynnti í síðustu viku að félagið hefði fært öll heildsöluviðskipti yfir til Símans, en þau voru áður hjá Vodafone. Viktor segir að tilfærslan muni gera rekstur Tals öruggari. „Rekstrarumhverfi okkar hefur ekki verið nægilega öruggt í viðskiptum við Vodafone, sem hefur verið duglegt að senda okkur reikninga sem við teljum að ekki sé tilefni fyrir. Það er ágreiningsefni um það á milli félaganna. Með því að ná kúnnafjöldanum aftur þá getum við vel við unað."

Í ársreikningi Tals er fjallað sérstaklega um þessar deilur og segir að „verði lyktir málanna hins vegar aðrar og óhagstæðari en þær sem stjórnendur og lögmaður félagsins telja líklegar […] er hugsanleg skuldbinding vegna þess um 119 millj. kr. án vaxta".

Í skráningarlýsingu Vodafone, sem birt var á mánudag, kemur fram að um sé að ræða reikninga sem félagið gaf út á hendur Tali vegna kaupa Tals á gagnaflutningi umfram tiltekin mörk og vegna innsláttar pantana. Þar segir einnig að Vodafone og Tal hafi undirritað samkomulag þess efnis að Tal hætti alfarið í viðskiptavinum við Vodafone þann 13. desember 2012.