David Villa fer ekki frá Barcelona

Forseti Barcelona, Sandro Rosell, segir að sóknarmaðurinn David Villa muni ekki fara frá félaginu nú í janúar.

Villa hefur verið orðaður við Arsenal að undanförnu, sem og Liverpool, í ensku úrvalsdeildinni.

„Ég útiloka algjörlega að Villa verði seldur nú í janúar. Hann er okkar leikmaður og við þurfum á honum að halda. Það er enn mikið eftir af tímabilinu," sagði Rosell.

Barcelona keypti Villa fyrir 34 milljónir punda frá Valencia árið 2010. Hann fótbrotnaði hins vegar illa fyrir rúmu ári síðan og hefur átt erfitt með að vinna sér fast sæti í liði Barcelona í haust.