Sprewell handtekinn á Gamlárskvöld

Latrell Sprewell spilaði í þrettán ár í NBA-deildinni og lék þá með Golden State Warriors, New York Knicks og Minnesota Timberwolves á árunum 1992 til 2005. Hann komst meðal annars í fréttirnar fyrir að ráðast á þjálfara sinn hjá Golden State og hafna 21 milljón dollara samningi við Golden State af því að hann þurfti meira til að sjá fjölskyldu sinni farborða.

Sprewell komst aftur í fréttirnar um áramótin þegar hann endaði á bak við lás og slá en hann er nú orðinn 42 ára gamall. Sprewell býr nú í Milwaukee og lögreglan þurfti að hafa afskipti af honum á Gamlárskvöld vegna mikils hávaða frá húsi hans.

Lögreglan kom á staðinn og handtók Sprewell eftir að hafa fengið tvær kvartanir á einum klukkutíma. Þetta var ekki í fyrsta sinn sem nágrannarnir kvörtuðu undan alltof miklum hávaða frá húsi Latrell Sprewell. Lögreglan vildi ekki gefa meira upp um málið en líklegt er að Sprewell hafi ekki tekið alltof vel í heimsókn þeirra.

Latrell Sprewell fékk meira en 97 milljónir dollara í laun á ferlinum en hefur verið undanfarin ár í talsverðum fjárhagskröggum. Hann missti meðal annars glæsiskútu sína 2007, húsið sitt árið eftir og skuldaði skattinum 3,5 milljónir dollara árið 2011.