Vilanova: Pep er besti þjálfari heims

Þegar Tito Vilanova tók við Barcelona-liðinu af Pep Guardiola vissi hann sem var að menn myndu bera hann saman við Guardiola sem náði einstökum árangri með Barcelona-liðið.

Vilanova hefur farið frábærlega af stað sem þjálfari Barcelona og liðið þegar búið að setja stigamet eftir frábæra byrjun í deildinni.

"Ég er ekki búinn að vinna neitt. Almennt myndi ég tapa í öllum samanburði við Pep," sagði Vilanova en hann var aðstoðarmaður Guardiola.

"Mér finnst ég eiga hlut í okkar árangri og ég er því líka að keppa við sjálfan mig. Það er svo frábært að heyra að Pep ætli að fara að þjálfa á nýjan leik. Fótboltinn þarf á því að halda að besti þjálfarinn taki aftur til starfa. Ég efast ekkert um að hann muni slá í gegn hvar sem hann fer að vinna."