Keflavík í undanúrslit bikarsins

Keflavík tryggði sér í dag sæti í undanúrslitum Powerade-bikarkeppni kvenna með sigri á KR-ingum.

Keflavík vann tíu stiga sigur, 66-56. Liðið byrjaði mjög vel og var með átján stiga forystu í hálfleik, 42-24. KR-ingar skoruðu aðeins sjö stig í fyrsta leikhluta.

KR-ingar mættu mun sterkari til leiks í seinni hálfleik og náðu að minnka muninn í fimm stig í lok þriðja leikhluta. En nær komust heimamenn ekki.

Pálína Gunnlaugsdóttir skoraði sautján stig fyrir Keflavík og Birna Guðmundsdóttir fimmtán, auk þess að taka tíu fráköst.

Hjá KR var Sigrún Sjöfn Ámundadóttir stigahæst með átján stig en Guðrún Gróa Þorsteinsdóttir var með sextán. Báðar tóku níu fráköst.

Keflavík er á toppi Domino's-deildar kvenna og KR í fjórða sæti.

8-liða úrslitin:

Hamar - Stjarnan 86-60

KR - Keflavík 56-66

Þór Ak. - Snæfell (í dag kl. 15.30)

Grindavík - Valur (á morgun kl. 19.15)