Barcelona valtaði yfir Cordoba

Barcelona komst auðveldlega áfram í næstu umferð spænska konungsbikarsins í kvöld er liðið valtaði yfir neðrideildarlið Cordoba, 5-0. Barcelona vann rimmu liðanna því 7-0 samanlagt en Barca vann fyrri leikinn 2-0.

Börsungar gátu leyft sér að hvíla margar af helstu stjörnum sínum í kvöld en stillti engu að síður upp ógnarsterku liði enda hópur liðsins frábær.

Barcelona kláraði dæmið í fyrri hálfleik þar sem liðið skoraði þrjú mörk. Thiago Alcantara skoraði fyrst og svo bætti David Villa við tveimur mörkum.

Alexis Sanchez sá um markaskorunina í síðari hálfleik. Setti tvö mörk og innsiglaði glæstan sigur Börsunga.